رسالة من مقصوفة الرقبة

هاااااااااااااااااااي

أعرفكم بنفسي : مقصوفة الرقبه ...
طلعت فى الدنيا معرفش اسم ليا غيره
... روحى يا مقصوفة الرقبه .. تعالى يا مقصوفة الرقبه
... عملت ده ليه؟؟ معملتيش ده ليه ؟؟
... انتى قاعدة يا مقصوفة الرقبه ان ما وريتك ... عاملالى هانم يا بنت ال ... .
فى البيت الذى اعيش فيه اطفال من سنى او اكبر واصغر لا يمكننى ان امارس ما يمارسونه ولا استمتع بحياتى مثلهم لأننى مقصوفة رقبه وبنت .... .
فى النادي الفخم أذهب مع سيدتى لأرعى البيه الصغير و أفرجه وأأكله على المرجيحه ... ممنوع عليا أن أتكلم مع مقاصيف الرقبه الأخريات علشان ما يلخبطوش دماغى ويفتحوا عينيه ( هكذا تقول سيدتى ) .

ألبس ملابس شيك جدا من ملابس اسيادى القديمه وهذا منتهى أملى،
كل شهر تاتى امي وتأخذ الاجره وتذكرنى باننى فى نعمة أحسد عليها ساكنه فى بيت ماكانش ابويا يحلم يعدي في ظله ، باركب عربيات ماكانش أبويا يحلم يموت تحت عجلها ، بدخل نوادي ماكانش أبويا يجرؤ يعدي من جنب سورها ، باكل أكل البهوات والبس لبس البهوات
و انا بحمد ربنا على النعمه دى ...
والله ماحدش بيأذيني ولا بيعذبنى او بيضربنى ..
بس نفسى اركب مرجيحه نفسى اقعد على كرسي زي الهانم نفسى حتى أختار الأكل اللى باكله نفسى حد ينادينى باسمى ... حتى فى النادي تجلس الهوانم وتسأل كل واحده التانيه مقصوفة الرقبه بتاعتك دي غلبانه ومنكسره وشكلها كده بتاعت شغل جايباها منين
ترد الأخرى بسرعة ( خايفه لتخطفها ) يووه ميغركيش منظرها دى لئيمه وسوسه ومغلبانى يا ما تحت السواهى ..
انظر لمثيلاتى من مقاصيف الرقبه الفلبينيه واللا السيريلانكيه ..
اشعر ان الهانم هي اللى مقصوفة رقبه عندها، هو ذنبى ان انا مصريه ويتيمه ..
عارفين ساعات كده بأسرق نفسى منهم وأتفرج على الأخبار .. حسيت ان العالم كله مقاصيف رقبه ..

الناس مقاصيف رقبه عند حكامهم والحكام مقاصيف رقبه عند أسيادهم وأسيادهم مقاصيف رقبه عند شياطينهم .. استريحت لما عرفت أن مش أنا لوحدي اللى مقصوفة رقبه .. وكلها سنتين ثلاثه واشم نفسى واعيش فيلم مصرى ويمكن فى يوم من الأيام ابقى ممثله واللا رقاصة .. ويطلع لي اسم ساعتها أنا اللى حاختاره ويبقى العالم كله مقاصيف رقبه عندى .

امضاء

مقصوفة الرقبه .

باااااااي

غرام
اشكرا جداجدا
على الكلمات الجميله
سلمت الايادى وفى انتظار جديدك

صلاح الروعه هو حضورك ومرورك الجميل
نورت الموضوع

» رسالة شكر وامتنان
» رسالة لكل فتاة